Parikan Suroboyoan: Coblosan

Mas Bendo: ndik Suroboyo menyang Tunjungan

mbanting busi dipane kayu

paklik Rasiyo memang pengalaman

ning Lucy pancene ayu

Mbak Yu : nyilih kain popok nang Karangan

momong rojo koyo bareng Rhoma Irama

milih pemimpin, rek, ojok sembarangan

lek wong Suroboyo yo jelas milih Bu Risma

(Iyo, rek. Tak kandhani koen yo; lha lek cumak bondho ayu thok, lha digawe opo?! Pemimpin iku kudune lak cak-cek, opomaneh masalah Suroboyo iku uakeh puoll. Banjir umpamane. Lha lek ngatasi banjir ditinggal wedhak'an dhisik, lak selak klelep wargane)

Mas Bendo: mangan delima kleleken kecik

sapi karo kebo kelonan wae

prestasine Bu Risma pancene apik

tapi opo salahe njajal calon liyane

(Lha, sopo ngerti paklik Rasiyo karo Ning Lucy iku lek diwenehi kesempatan isok gawe kutho Suroboyo luwih apik. Lha lek durung dijajal wis dianggep gak mampu, iku termasuk kliru, Mbak Yu.)

Mbak Yu: penari japin numpak gerobak

peniti kae pasangno nang kain katun

milih peminpin ojok cobak-cobak

sing mesti-mesti ae ben engko ora getun

(Sampeyan iku, Cak, Cak. Milih peminpin kok cobak-cobak. Koyok nganggo minyak kayu putih ae. Pokok'e aku wis madhep mantep, gepeng ilir aku tetep milih Bu Risma)

Kang Karib : banyu aki dicampur terasi

rondho lesehan nang pojok plataran

yo ngene iki urip ing zaman demokrasi

bedo pilihan ojok sampek dadi tukaran

bantalan lesung mergo gak duwe dipan

upo ning kendhi lambene dilat-dilat

pemilihan langsung pancen butuh kedewasaan

sopo ae sing dadi awak'e dhewe tetap ae melarat rakyat

(wis talah, rek. Gak usah gegeran mergo bedo pilihan. Opo koen pikir lek jagomu sing dadi terus peno gak perlu nyambut gawe. Lha sopo sing ngingoni anak-bojomu? Mbahne Sangkil opo! Ayo, sing penting nyambut gawe, perkoro mengko pemimpin (calon sing endi ae sing menang) ora lali janjine, yo syukur. Lha lek ingkar janji, ayo didungakno bareng-bareng mugo-mugo gudhiken sak kujur awak'e.)*****